UGC NET Applications: యూజీసీ నెట్‌ పరీక్ష దరఖాస్తుల గడువు పొడిగింపు

దిల్లీ: యూజీసీ -నెట్‌(UGC-NET) డిసెంబర్‌ 2023 పరీక్ష దరఖాస్తుల గడువు పొడిగించారు. తొలుత నిర్ణయించిన గడువు శనివారం (అక్టోబర్‌ 28)తో గడువు ముగియనుండటంతో ఎన్‌టీఏ-యూజీసీ తాజా నిర్ణయం తీసుకున్నాయి. దీంతో అభ్యర్థులు అక్టోబర్‌ 31వ తేదీ రాత్రి 11.59 గంటల వరకు ఆన్‌లైన్‌లో https://ugcnet.ntaonline.in/ దరఖాస్తులు చేసుకోవచ్చు. అలాగే, దరఖాస్తు రుసుం చెల్లింపు గడువును సైతం అక్టోబర్‌ 31వరకు వరకూ పొడిగించారు. దరఖాస్తుల్లో ఏవైనా తప్పులుంటే నవంబర్‌ 1 నుంచి 3వ తేదీ వరకు సరిచేసుకొనేందుకు అవకాశం కల్పిస్తున్నట్లు పేర్కొన్నారు. జూనియర్‌ రీసెర్చి ఫెలోషిప్‌, విశ్వవిద్యాలయాల్లో అసిస్టెంట్‌ ప్రొఫెసర్‌ పోస్టులకు పోటీపడేందుకు ఉపయోగపడే ఈ పరీక్షను డిసెంబర్‌ 6 నుంచి 22 వరకు నిర్వహించనున్నట్టు జాతీయ పరీక్షల సంస్థ (NTA) ఇటీవల షెడ్యూల్‌ విడుదల చేసిన విషయం తెలిసిందే.  మొత్తం 83 సబ్జెక్టుల్లో జరిగే కంప్యూటర్‌ ఆధారిత పరీక్ష (CBT) నిర్వహించనున్నారు.