మెదడుకూ మేలే

గుండె ఆరోగ్యంగా ఉండటానికి ఏం చేయాలో తెలిసిందే. ఆరోగ్యకరమైన ఆహారం తినాలి. తగినంత వ్యాయామం చేయాలి. పొగ అలవాటు జోలికి వెళ్లొద్దు. అతిగా మద్యం తాగొద్దు. ఇలాంటి ఆరోగ్యకరమైన అలవాట్లు గుండెకే కాదు. మెదడుకూ మేలు చేస్తాయి. తీవ్ర మతిమరుపును తెచ్చిపెట్టే డిమెన్షియా లేని వృద్ధులను పరిశోధకులు 21 ఏళ్ల పాటు పరిశీలించి దీన్ని కనుగొన్నారు. అధ్యయనం చివర్లో ప్రతి ఒక్కరిలోనూ వేర్వేరుగా పొగ తాగటం, మద్యం అలవాటు, ఊబకాయం, కొలెస్ట్రాల్‌, రక్తపోటు వంటి గుండెజబ్బు ముప్పు కారకాలను నిశితంగా విశ్లేషించారు. జ్ఞాపకశక్తి, ఆలోచనా నైపుణ్యాలనూ పరీక్షించారు. గుండెజబ్బు ముప్పు ఎక్కువగా గలవారిలో మెదడు సామర్థ్యమూ వేగంగా క్షీణిస్తూ వస్తున్నట్టు తేలటం విశేషం.