ఎక్కిళ్లకు స్ట్రా చికిత్స

ఏడు గుటకల నీళ్లు తాగటం, ఊపిరి బిగపట్టటం, కాగితపు సంచీలోకి గాలి ఊదటం, నిమ్మకాయ ముక్క చప్పరించటం.. ఇలా ఎక్కిళ్లు తగ్గటానికి ఎవరికి తోచిన చిట్కాలు వారు పాటిస్తుంటారు. ఇవి ఎంతవరకు పనిచేస్తాయో తెలియదు గానీ యూనివర్సిటీ ఆఫ్‌ టెక్సాస్‌ హెల్త్‌ సైన్స్‌ సెంటర్‌కు చెందిన ఓ ప్రొఫెసర్‌ ఎక్కిళ్లకు ప్రత్యేకమైన స్ట్రాను రూపొందించారు. ఎల్‌ ఆకారంలో, గట్టిగా ఉండే దీన్ని గ్లాసులో పెట్టి.. వెంట వెంటనే మూడు సార్లు నీళ్లు తాగాల్సి ఉంటుంది. స్ట్రా అడుగున కవాటం ఉంటుంది. అందువల్ల చాలా గట్టిగా నీటిని పీల్చుకోవాల్సి ఉంటుంది. ఇలా చేస్తున్నప్పుడు కడుపు, ఛాతీ కుహరానికి మధ్యలో ఉండే డయాఫ్రం పొర కిందికి దిగుతుంది. శ్వాసనాళంలోకి ఆహారం వెళ్లకుండా అడ్డుపడే ఎపిగ్లోటస్‌ మూసుకుంటుంది. అదే సమయంలో ఫ్రెనిక్‌, వేగస్‌ నాడులు ప్రేరేపితమవుతాయి. దీంతో పరిస్థితిని చక్కదిద్దటానికి మెదడుకు అవకాశం లభిస్తుంది. ఎక్కిళ్లు ఆగిపోతాయి.