కృష్ణా బోర్డును కర్నూలులో ఏర్పాటు చేయండి

జల్‌శక్తి స్టాండింగ్‌ కమిటీ ఛైర్మన్‌కు ఎంపీ మాధవ్‌ వినతి

ఈనాడు, దిల్లీ: కృష్ణా నది యాజమాన్య బోర్డును (కేఆర్‌ఎంబీ) కర్నూలులో ఏర్పాటు చేయాలని హిందూపురం ఎంపీ గోరంట్ల మాధవ్‌ జల్‌శక్తి స్టాండింగ్‌ కమిటీ ఛైర్మన్‌ సంజయ్‌ జైస్వాల్‌కు విజ్ఞప్తి చేశారు. గురువారం జల్‌శక్తి స్టాండింగ్‌ కమిటీ సమావేశం అనంతరం సాగు నీటికి సంబంధించి అంశాలపై జైస్వాల్‌తో చర్చించి వినతిపత్రం అందించారు. ఏపీ పునర్విభజన చట్టాన్ని గౌరవించి తెలుగు గంగ, వెలిగొండ, గాలేరు నగరి, హంద్రీనీవా ప్రాజెక్టులను అనుమతి పొందిన వాటిగా ప్రకటించాలని కోరారు. రాష్ట్రంలో జలాల అంతర్గత సర్దుబాటు చేసుకునే హక్కు రాష్ట్రానికే ఉండేలా నోటిఫికేషన్‌లో స్పష్టంగా పేర్కొనాలని వినతిపత్రంలో పేర్కొన్నారు.