తిరుమలలో దర్శనానికి 30 గంటలు

తిరుమల, న్యూస్‌టుడే: తిరుమల శ్రీవారి సర్వదర్శనానికి గురువారం భక్తులు భారీగా తరలివచ్చారు.  పెరటాసిమాసం మూడో శనివారంతోపాటు వరుస సెలవులు రావడంతో తమిళనాడునుంచి భక్తుల రద్దీ పెరిగింది. వైకుంఠం క్యూకాంప్లెక్స్‌లోని కంపార్ట్‌మెంట్లు, నారాయణగిరి షెడ్లు నిండిపోయి శిలాతోరణం దాటి క్యూలైన్‌లో భక్తులు వేచి ఉన్నారు. వీరికి స్వామివారి దర్శనానికి 30 గంటల సమయం పడుతుందని తితిదే ఓ ప్రకటనలో తెలిపింది. అనూహ్యంగా రద్దీ పెరిగి క్యూలైన్‌లోని భక్తులు రింగ్‌రోడ్డులోని శిలాతోరణం వరకు వేచి ఉండడంతో ఆ ప్రాంతాన్ని తితిదే ఈవో ఏవీ ధర్మారెడ్డి, పరిశీలించారు. బుధవారం శ్రీవారిని 63,579 మంది దర్శించుకున్నారు. హుండీ ఆదాయం రూ.1.95 కోట్లు లభించగా 34,524 మంది తలనీలాలు సమర్పించారు.