ఐనవోలు మల్లన్నకు పెద్ద పట్నం

హనుమకొండ జిల్లాలోని ఐనవోలు మల్లన్న క్షేత్రంలో ఆదివారం పెద్ద పట్నం వేశారు. సంక్రాంతి నుంచి ఉగాది వరకు జరిగే జాతర ఉత్సవాల్లో భాగంగా చివరి ఆదివారం మల్లన్న కల్యాణం, పెద్ద పట్నం వేయడం ఆనవాయితీ. ఈ ఉత్సవాలను తిలకించేందుకు భక్తులు అధిక సంఖ్యలో తరలివచ్చారు. దేవస్థాన ప్రాంగణంలోని నటరాజ విగ్రహం ఎదురుగా 4 గంటల పాటు శ్రమించి 20 అడుగుల పొడవు, వెడల్పుతో ఒగ్గు పూజారులు వేసిన పెద్ద పట్నం భక్తులకు కనువిందు చేసింది. ఉత్సవమూర్తులతో 5 ప్రదక్షిణలు చేసి పట్నంలోకి వేలుకొల్పి పూజలు చేసి నైవేద్యం సమర్పించారు.

న్యూస్‌టుడే, ఐనవోలు(హనుమకొండ)