Botsa Satyanarayana: మంత్రి బొత్సకు హృద్రోగ సమస్యలు !

ఈనాడు, విజయనగరం: రాష్ట్ర విద్యాశాఖ మంత్రి బొత్స సత్యనారాయణకు(Botsa Satyanarayana) హృదయ సంబంధ సమస్యలు ఉన్నట్లు తెలిసింది. గురువారం ఉదయం వైద్య పరీక్షల నిమిత్తం కుమారుడు సందీప్‌తో కలిసి హైదరాబాద్‌ వెళ్లారు. అక్కడ ఓ హార్ట్‌ ఆసుపత్రిలో పరీక్షలు చేయించుకున్నట్లు సమాచారం. వైద్య నిపుణుల సూచనల మేరకు గుండెకు స్టెంట్లు వేయాలా.. శస్త్రచికిత్స చేయాలా.. అన్నది నిర్ణయిస్తారని తెలిసింది. ప్రస్తుతానికి మంత్రి ఆరోగ్యంగానే ఉన్నారని కుటుంబ సభ్యులు తెలిపారు. మంత్రి జ్వరంతో బాధపడుతూనే ఈ నెల 4న ఎస్‌.కోటలో జరిగిన సామాజిక సాధికార యాత్రలో పాల్గొన్నారు. 5న శ్రీకాకుళం జిల్లా పలాస వెళ్లారు. మరుసటి రోజు విశాఖలోని ప్రైవేటు ఆసుపత్రిలో పరీక్షలు చేయించుకున్నారు. ఆ పరీక్షల్లో హృదయ సంబంధ సమస్యలు ఉన్నాయని, మెరుగైన చికిత్స అవసరమని నిపుణులు సూచించారు. దీంతో గురువారం విజయనగరంలో మేనకోడలు వివాహం చూసుకుని ఆయన హైదరాబాద్‌ వెళ్లాలని అనుకున్నా.. కుటుంబ సభ్యుల సూచనలతో ముందుగానే వెళ్లారు.