Restaurants Service Charge: రెస్టారెంట్‌లు సేవా రుసుం విధించకుండా కొత్త నియమావళి

వినియోగదారు వ్యవహారాల కార్యదర్శి రోహిత్‌ కుమార్‌

దిల్లీ: వినియోగదారుల నుంచి రెస్టారెంట్‌లు సేవా రుసుం వసూలు చేయకుండా నియంత్రించడానికి ప్రభుత్వం న్యాయపరమైన నియమావళిని త్వరలో తీసుకురానున్నట్లు వినియోగదారు వ్యవహారాల కార్యదర్శి రోహిత్‌ కుమార్‌ వెల్లడించారు. వినియోగదారులు, రెస్టారెంట్‌ల సంఘాల ప్రతినిధులతో ఆయన గురువారం సమావేశమయ్యారు. సేవా రుసుం వసూలు చేయడం న్యాయబద్ధమేనని సంఘాలు చెబుతున్నప్పటికీ.. వినియోగదారుల హక్కులకు ఇది ప్రతికూలంగా ఉందని, అనైతిక వ్యాపార విధానంగా వినియోగదారు వ్యవహారాల విభాగం పరిగణిస్తున్నట్లు స్పష్టం చేశారు. 2017 మార్గదర్శకాలు అమలు కావడం లేదు కనుక, కొత్త నియమావళిని తీసుకురానున్నట్లు స్పష్టం చేశారు. ఈ సమావేశానికి నేషనల్‌ రెస్టారెంట్‌ అసోసియేషన్‌ ఆఫ్‌ ఇండియా (ఎన్‌ఆర్‌ఏఐ), ఫెడరేషన్‌ ఆఫ్‌ హోటల్‌ అండ్‌ రెస్టారెంట్‌ అసోసియేషన్స్‌ ఆఫ్‌ ఇండియా (ఎఫ్‌హెచ్‌ఆర్‌ఏఐ), ముంబయి గ్రాహక్‌ పంచాయత్‌, పుష్ప గిరిమాజీ సహా వినియోగదారు సంఘాల ప్రతినిధులు హాజరయ్యారు.