Infosys Foundation: ఇన్ఫీ దాతృత్వం.. పేద బాలికల చదువుకు ₹100 కోట్లు

ఇంటర్నెట్‌డెస్క్‌: దేశీయ ఐటీ దిగ్గజం ఇన్ఫోసిస్‌ (Infosys) దాతృత్వానికి ముందుకొచ్చింది. వెనకబడిన కుటుంబాలకు చెందిన బాలికల చదువుకు తన వంతున సహకారం అందించాలని నిర్ణయించింది. ఇందులో భాగంగా ఇన్ఫోసిస్‌ ఫౌండేషన్‌ ద్వారా బాలికలకు స్కాలర్‌షిప్‌లను అందించనుంది. ఇందుకోసం రూ.100 కోట్లు ఖర్చు చేయనున్నట్లు ఇన్ఫోసిస్‌ ఫౌండేషన్‌ ఓ ప్రకటనలో తెలిపింది.

ఇందుకోసం 'STEM Stars' పేరుతో స్కాలర్‌షిప్‌ను తీసుకురానుంది. ఈ స్కాలర్‌షిప్‌ల ద్వారా బాలికల చదువుకు ఆర్థిక సాయం అందుతుందని ఇన్ఫోసిస్‌ ఫౌండేషన్‌ తెలిపింది. ట్యూషన్‌ ఫీజు, వసతి ఖర్చులు, స్టడీ మెటీరియల్‌ ఇలా.. అన్నింటికీ కలిపి ఏడాదికి లక్ష రూపాయలు.. నాలుగేళ్ల పాటు ఆర్థిక సాయాన్ని అందిస్తామని వెల్లడించింది. ఈ కార్యక్రమం మొదటి ఫేజ్‌లో భాగంగా 2,000 మందికి పైగా బాలికల చదువుకు సాకారం అందించనుంది. దేశంలోని ప్రముఖ కళాశాలల్లో సైన్స్‌, టెక్నాలజీ, ఇంజినీరింగ్‌, గణితం (STEM) ఏ విభాగంలో ఉన్నత విద్యను అభ్యసించినా ఇన్ఫీ ఫౌండేషన్‌ వారి ఆ బాధ్యతలు చూసుకుంటుంది.

విశాఖ To తిరుమల.. ఐఆర్‌సీటీసీ ప్యాకేజీ వివరాలివే..

‘ఆడపిల్లల చదువు వారి పిల్లల జీవితంపై ప్రభావం చూపుతుంది. అందుకే మేం 'STEM Stars' స్కాలర్‌షిప్‌ను తీసుకొచ్చాం. తొలి ఏడాదిలో ఐఐటీ, బిట్స్‌ పిలానీ, ఎన్‌ఐటీతో పాటు నేషనల్‌ ఇన్‌స్టిట్యూట్ ర్యాంకింగ్ ఫ్రేమ్‌వర్క్ (NIRF) గుర్తింపు పొందిన ఇతర ఉన్నత విద్యా సంస్థల్లో చదవాలనుకున్న విద్యార్థులకు సహకారం అందిస్తాం’ అని ఇన్ఫోసిస ఫౌండేషన్‌ ట్రిస్టీ సుమిత్‌ విర్మనీ తెలిపారు.