Hyderabad: శౌచాలయంలో బంధించి మూగ మహిళపై అత్యాచారం

హైదరాబాద్‌: నగరంలోని హుమాయున్‌నగర్‌ పీఎస్‌ పరిధిలో దారుణం జరిగింది. చెవిటి, మూగ మహిళపై ఓ యువకుడు దారుణానికి ఒడిగట్టాడు. ఇంటికి ఎదురుగా ఉండే సాయి అనే యువకుడు ఆమెపై అత్యాచారానికి పాల్పడ్డాడు. ఇంట్లో ఎవరూ లేని సమయంలో మహిళను శౌచాలయంలో బంధించి అత్యాచారం చేశాడు. మహిళ భర్త కూడా దివ్యాంగుడే. తన తల్లిని తీసుకుని అతను బయటకు వెళ్లిన సమయంలో ఇంట్లోకి చొరబడిన సాయి ఈ దారుణానికి పాల్పడ్డాడు.

బాధితురాలు మూగ కావడంతో అరవలేకపోయింది. ఆపై శౌచాలయంలోనే మహిళను ఉంచి గడియపెట్టి వెళ్లిపోయాడు. ఇంటికి వచ్చి గమనించిన భర్త.. ఏమైందని అడగడంతో ఆమె జరిగిన దారుణాన్ని వివరించింది. దీంతో హుమాయున్‌ నగర్ పోలీసులకు కుటుంబసభ్యులు ఫిర్యాదు చేశారు. కేసు నమోదు చేసిన పోలీసులు సాయిని అరెస్టు చేశారు. గతంలోనూ అతని చేష్టలపై పోలీసులకు ఫిర్యాదు చేసినట్లు కుటుంబ సభ్యులు తెలిపారు.