ఐఈడీ పేలి సాయుధ బలగాల ఏసీపీ మృతి

ఛత్తీస్‌గఢ్‌లో మావోయిస్టుల కోసం గాలిస్తుండగా ఘటన

దుమ్ముగూడెం, న్యూస్‌టుడే: మావోయిస్టుల కోసం గాలిస్తుండగా ఐఈడీ బాంబు పేలి ఓ పోలీసు అధికారి మృతిచెందారు. ఈ సంఘటన సోమవారం ఛత్తీస్‌గఢ్‌లోని బీజాపుర్‌ జిల్లాలో చోటుచేసుకుంది. తిమినార్‌ క్యాంప్‌ నుంచి ఆ రాష్ట్రానికి చెందిన సాయుధ భద్రతా బలగాలు ఎటపాల్‌ రహదారి మార్గంలో మావోయిస్టుల కోసం గాలింపు చర్యలు చేపట్టాయి. ఈ క్రమంలో ఆ రహదారి మధ్యలో మావోయిస్టులు అమర్చిన ఐఈడీలపై ఉదయం 7 గంటల సమయంలో సాయుధ బలగాల అసిస్టెంట్‌ ప్లాటూన్‌ కమాండర్‌ విజయ్‌యాదవ్‌ (40) కాలు వేయడంతో ఒక్కసారిగా అవి పేలిపోయాయి. దీంతో తీవ్రగాయాల పాలైన ఆయన అక్కడికక్కడే మృతిచెందారు. మృతుడు ఉత్తర్‌ప్రదేశ్‌ రాష్ట్రం బల్లియా జిల్లాలోని రాజ్‌పుర్‌ గ్రామానికి చెందినవారు.