పంట వ్యర్థాలకు నిప్పు.. మంటల ధాటికి రైతు బలి

మడికొండ, న్యూస్‌టుడే: వానాకాలం సాగుకు పొలాన్ని సిద్ధం చేయడానికి మొక్కజొన్న, పత్తి పంట వ్యర్థాలకు నిప్పు పెట్టిన రైతు.. మంటల వేడి, పొగ కారణంగా తనూ మృతి చెందిన విషాదకర సంఘటన హనుమకొండ జిల్లాలో చోటుచేసుకొంది. కుటుంబ సభ్యులు, తోటి రైతులు తెలిపిన వివరాల ప్రకారం.. ధర్మసాగర్‌ మండలం నర్సింగరావుపల్లి గ్రామానికి చెందిన రైతు దయ్యాల కుమారస్వామి(55)కి మడికొండ, ఎల్కుర్తి శివారులో ఎకరంన్నర వ్యవసాయ పొలం ఉంది. పత్తి, మొక్కజొన్న పంటల వ్యర్థాలను కాల్చేసి భూమిని సాగుకు సిద్ధం చేయాలని గురువారం పొలానికి వెళ్లారు. మధ్యాహ్న సమయంలో వ్యర్థాలకు నిప్పు పెట్టారు. గాలి ఎక్కువవడంతో మంటలు పక్కపొలంలో నిల్వ చేసిన గడ్డివాములకు అంటుకున్నాయి. ఆందోళన చెందిన కుమారస్వామి చెట్ల కొమ్మలతో మంటలు ఆర్పే ప్రయత్నం చేస్తుండగా మంటల వేడికి కాళ్లు, చేతులు బొబ్బలెక్కాయి. పొగ కారణంగా ఊపిరి ఆడక స్పృహతప్పి పడిపోయి మృతి చెందారు. చుట్టుపక్కల రైతులు గమనించి కుటుంబ సభ్యులకు సమాచారమిచ్చారు. ఆయనకు భార్య, కుమారుడు ఉన్నారు.