Andhra News: కుప్పకూలిన రెండంతస్తుల భవనం.. భయంతో జనం పరుగులు

పలాస: శ్రీకాకుళం జిల్లా పలాస పట్టణంలో రెండు అంతస్తుల భవనం కుప్పకూలింది. భయాందోళనతో జనం పరుగులు తీశారు. పలాస కేటీ రోడ్డులో చిరు వ్యాపారం నిర్వహిస్తున్న మల్లా కామేశ్వరరావుకు చెందిన రెండు అంతస్తుల భవనం గురువారం సాయంత్రం ఒక్కసారిగా కూలిపోయింది. భవనం శిథిలాలు పక్కనే ఉన్న పలాస మండలం శాసనాం గ్రామానికి చెందిన పార్వతీశం టీ దుకాణంపై పడ్డాయి. విద్యుత్‌ శాఖ అధికారులు అప్రమత్తమై సరఫరా నిలిపివేశారు. పురపాలక సంఘం అధ్యక్షుడు బల్ల గిరిబాబు, తహసీల్దార్‌ మధుసూదన్‌, కమిషనర్‌ రాజగోపాల్‌రావు ఘటనా స్థలాన్ని పరిశీలించారు. కాశీబుగ్గ పోలీసులు అక్కడకు చేరుకొని ట్రాఫిక్‌ను క్రమబద్ధీకరించారు. నిత్యం రద్దీగా ఉండే మార్గంలో భవనం కూలడం.. ఆ సమయంలో జన సంచారం లేకపోవడంతో పెనుప్రమాదం తప్పింది. పాత భవనం కావడంతో వర్షాలకు గోడలు తడిసి కూలిందని అధికారులు తెలిపారు.