ఈవీఎంలలో చిప్‌ మారుస్తా.. మిమ్మల్ని గెలిపిస్తా

శివసేన(యూబీటీ) నేతను రూ.2.5 కోట్లు డిమాండ్‌ చేసిన జవాను అరెస్ట్‌

ఛత్రపతి శంభాజీనగర్‌: డబ్బులిస్తే ఈవీఎంలలో చిప్‌ను మార్చి ఎక్కువ ఓట్లు పడేలా చేస్తానని మోసగించేందుకు యత్నించిన ఓ జవానును పోలీసులు అదుపులోకి తీసుకున్నారు. మహారాష్ట్రలోని ఛత్రపతి శంభాజీనగర్‌లో పోలింగ్‌ విధుల్లో ఉన్న ఆర్మీ జవాను మారుతీ దక్‌నే (42) ఈవీఎంలలో చిప్‌ను మార్చి అధిక ఓట్లు పడేలా చేస్తానంటూ శివసేన (యూబీటీ) నేత అంబాదాస్‌ దాన్వేను ఆశ్రయించాడు. గతంలో ఈ విధానం ఓ అభ్యర్థి విజయానికి ఉపయోగపడిందని నమ్మబలికాడు. ఇందుకోసం తనకు రూ. 2.5 కోట్లు ఇవ్వాలని డిమాండు చేశాడు. దీనిపై దాన్వే పోలీసులకు ఫిర్యాదు చేశారు. అనంతరం మంగళవారం అంబాదాస్‌ తమ్ముడు రాజేంద్ర ఓ హోటల్‌లో మారుతీతో సమావేశమయ్యారు.  చర్చల తర్వాత రూ.1.5 కోట్లకు ఒప్పందం కుర్చుకుని, టోకెన్‌ మొత్తం కింద రూ.లక్ష ఇచ్చారు. సాధారణ దుస్తుల్లో అక్కడే మాటువేసిన పోలీసులు వెంటనే సైనికుడిని పట్టుకున్నారు.