అత్యాచారం కేసు నిందితుడు 40 ఏళ్ల తర్వాత దొరికాడు

ఈటీవీ భారత్‌: అత్యాచారం కేసులో పరారీలో ఉన్న నిందితుడిని 40 ఏళ్ల తర్వాత అరెస్టు చేసిన ముంబయి పోలీసులు మంగళవారం కోర్టులో హాజరుపరిచారు. ముంబయికి చెందిన పాపా అలియాస్‌ దావూద్‌ 1984లో ఓ మహిళపై అత్యాచారానికి పాల్పడ్డాడు. 1985లో ఈ కేసుపై బాంబే సెషన్స్‌కోర్టులో విచారణ జరిగింది. ఆ విచారణకు పాపా హాజరుకాలేదు. దీంతో అతడు పరారీలో ఉన్నట్లు సెషన్స్‌జడ్జి ప్రకటించారు. నిందితుడిపై స్టాండింగ్‌ నాన్‌ బెయిలబుల్‌ వారెంట్‌ జారీ చేశారు. అప్పటినుంచీ ఈ కేసు పెండింగులో ఉండిపోయింది. ప్రస్తుతం ఎన్నికల కోడ్‌ అమలులో ఉన్నందున పాత రికార్డుల్లో పరారీలో ఉన్న నిందితులను గుర్తించి అరెస్టు చేసేందుకు ముంబయి డీసీపీ మోహిత్‌ కుమార్‌ గార్గ్‌ స్పెషల్‌డ్రైవ్‌ చేపట్టారు. ఈ క్రమంలో పాపా గురించి ఆరాతీయగా.. ముంబయిలో ఉన్న ఇంటిని అమ్మి ఎటో వెళ్లిపోయినట్లు తెలిసింది. నిందితుడితో పరిచయమున్న ఓ వ్యక్తితోపాటు ఇన్‌ఫార్మర్ల ద్వారా పాపా ఆగ్రాలో ఉన్నట్లు గుర్తించి అరెస్ట్‌ చేశారు.