ఓట్లు వేసేలా చైతన్యపరచాలి

ఆదిలాబాద్ సాంస్కృతికం: రానున్న లోక్‌సభ ఎన్నికల్లో తల్లిదండ్రులు, తాతయ్యలు, అమ్మమ్మలు, తల్లిదండ్రులను ఓటు వేయించేలా వారిని చైతన్య పరచాలని నృత్య శిక్షకురాలు గండ్రత్ అవంతిక పిల్లలను సూచించారు. జిల్లా కేంద్రంలోని శ్రీ రామచంద్ర గోపాలకృష్ణ మఠం ప్రాంగణంలో ఆదివారం వేసవి నృత్య శిక్షణ శిబిరంలో ఆమె ఓటుహక్కు, ఓటు విలువ గురించి అవగాహన కలిగించారు. ఇంటి పెద్దలు ఓటు వేసిన అనంతరం కుటుంబ సభ్యులతో సెల్ఫీలు దిగి సామాజిక మాధ్యమంలో పొందుపర్చాలని కోరారు. దేశంలోనే ఆదిలాబాద్ జిల్లాలో అత్యధిక పోలింగ్ నమోదుకు పాలనాధికారి రాజర్షిషా చేస్తున్న కృషిని స్ఫూర్తిగా తీసుకుని తమవంతుగా ఈ కార్యక్రమం చేపడుతున్నామని ఆమె తెలిపారు. తీవ్రమైన ఎండల దృష్ట్యా ఉదయం వేళలోనే ఓటు వేసేలా ప్రణాళిక చేసుకోవాలని సూచించారు. ఈ కార్యక్రమంలో పిల్లల తల్లిదండ్రులు, విద్యార్థులు పాల్గొన్నారు.