మౌలిక వసతుల్లేక అభివృద్ధికి దూరం

అర్లోయిపుట్టులో ఆదివాసులతో మాట్లాడుతున్న అధ్యయన బృంద సభ్యులు

ముంచంగిపుట్టు, పెదబయలు గ్రామీణం, న్యూస్‌టుడే: పీవీటీజీల జీవన విధానంపై అధికారులు అధ్యయనం చేస్తున్నారు. శనివారం ముంచంగిపుట్టు మండలంలోని లక్ష్మీపురం పంచాయతీ అర్లోయిపుట్టు, పెదబయలు మండలంలోని పలు గ్రామాల్లో బృంద సభ్యులు పర్యటించారు. వారి జీవన స్థితిగతులపై ఆరా తీశారు. దిల్లీ నుంచి వచ్చిన గిరిజన సంక్షేమ అఫైర్‌ కమిటీ కార్యదర్శి కొంజుబీహారీ, పాడేరు ఐటీడీఏ ఏపీఓ వెంకటేశ్వరరావు, ఆంధ్ర విశ్వవిద్యాలయం (టీసీఆర్‌టీఎం) ప్రొఫెసర్‌ ఆర్‌.శ్రీనివాస్‌ ఈ బృందంలో ఉన్నారు. సర్పంచి త్రినాథ్‌తో మాట్లాడి సమస్యలు తెలుసుకున్నారు. రహదారులు, అంగన్‌వాడీ కేంద్రాలకు పక్కా భవనాలు, సామాజిక భవనాలు తదితర మౌలిక సదుపాయాలు లేక ఆదివాసీ గ్రామాలు అభివృద్ధికి దూరమవుతున్నాయని అధికారులకు వివరించారు. వ్యవసాయ ఉత్పత్తులకు గిట్టుబాటు ధర కల్పించాలని, ఉపాధి హామీ పథకాన్ని పారదర్శకంగా అమలు చేయాలని కోరారు. ఆదివాసీ గ్రామాల్లో విద్య, వైద్యం, సాంకేతిక పరిజ్ఞానం అందించేందుకు చర్యలు చేపట్టాలని విన్నవించారు.