మే నెలలో ప‘రేషన్‌’ తప్పదా..!

మూడో వంతు డిపోలకు చేరని సరకులు
సరఫరాకు ససేమిరా అంటున్న హమాలీలు

ఎండీయూ వాహనం వద్ద కార్డుదారులు

విశాఖపట్నం, న్యూస్‌టుడే: మే నెలలో రేషను సరకుల పంపిణీ 1వ తేదీ నుంచి పూర్తి స్థాయిలో ప్రారంభమయ్యే సూచనలు కనిపించడం లేదు. పౌరసరఫరాల సంస్థ (సీఎస్‌సీ) రాష్ట్ర అధికారులు తీసుకున్న నిర్ణయం దీనికి కారణమైంది. నగర పరిధిలో రేషన్‌ డిపోలకు సరకులు చేరవేసేందుకు మర్రిపాలెంలో డిపో-1, డిపో-2 రెండు గోదాములు ఉన్నాయి. గోదాము-1 పరిధిలోని రేషన్‌ డిపోలకు సరకుల చేరవేతకు క్వింటాలుకు రూ.21 వరకు సీఎస్‌సీ ఖర్చు చేస్తోంది. గోదాము-2 పరిధిలోని వాటికి రూ.30 వరకు ఖర్చు చేస్తోంది.

• రవాణా ఖర్చులను తగ్గించే క్రమంలో గోదాము-2 పరిధిలోని చౌక డిపోలను గోదాము-1కు, మధురవాడ తదితర ప్రాంతాల్లోని వాటిని భీమునిపట్నం గోదాముకు కేటాయించారు. గోదాము-2 నుంచి 100కుపైగా రేషను డిపోలు వీడిపోవడంతో అక్కడ పనిచేస్తున్న హమాలీలు ఆదాయం కోల్పోయారు. దీంతో వారు భీమునిపట్నం గోదాముకు వెళ్లిన 25 చౌక డిపోల్లో సరకును ఎట్టి పరిస్థితిలో లోడింగ్‌, అన్‌లోడింగ్‌ చేయరాదని డిమాండ్‌ చేస్తూ అక్కడి పనులను అడ్డుకున్నారు. మరో పక్క గోదాము-1 పరిధిలో రేషను డిపోలు పెరగడంతో వాటిల్లో అధిక శాతానికి సరకులు చేరలేదు.
• జిల్లా వ్యాప్తంగా 600 డిపోలుంటే ప్రస్తుతం 400 డిపోలకు మాత్రమే సరకులు చేరాయి. ఒక్క రోజే గడువు ఉంది. దీంతో ఈనెల 1వ తేదీన తక్కువ మందికి రేషన్‌ అందే అవకాశం ఉంది.