ఫెసిలిటేషన్‌ కేంద్రాల సంఖ్య పెంపు

9,636 మంది ఉద్యోగుల ఓటు వినియోగం

ఎన్టీఆర్‌ కలెక్టరేట్‌, న్యూస్‌టుడే : ఉద్యోగుల పోస్టల్‌ బ్యాలట్ వినియోగ నిమిత్తం జిల్లాలో అదనపు ఫెసిలిటేషను కేంద్రాలు ఏర్పాటు చేశారు. విజయవాడలోని తుమ్మలపల్లి కళాక్షేత్రం, విజయవాడ సెంట్రల్‌, మైలవరం నియోజకవర్గాల ఆర్వోల కార్యాలయాల్లో ఆదివారం నూతనంగా పోస్టల్‌ బ్యాలట్‌ వినియోగ కేంద్రాలను ఏర్పాటు చేశారు. ఈ నెల 4, 5 తేదీల్లో (శని, ఆదివారాల్లో) మొత్తం 9,636 మంది ఉద్యోగులు తమ ఓటు హక్కును వినియోగించుకున్నట్టు కలెక్టర్‌ ఎస్‌.డిల్లీరావు తెలిపారు. విజయవాడ ఇందిరాగాంధీ మున్సిపల్‌ (ఐజీఎం) స్టేడియంలోని కేంద్రీకృత ఫెసిలిటేషన్‌ కేంద్రంలో రెండు రోజుల్లో 2,954 మంది పోస్టల్‌ బ్యాలట్‌ను వినియోగించున్నట్టు తెలిపారు. తొలి రోజు 1198, రెండో రోజు 1756 మంది ఓటు వేసినట్టు వివరించారు.