గొర్రెల యజమానులతో రెవెన్యూ అధికారి డబ్బుల డిమాండ్‌

ఆలస్యంగా వెలుగులోకి

బెళుగుప్ప, న్యూస్‌టుడే: గొర్రెల యాజమానుల నుంచి ఓ రెవెన్యూ అధికారి డబ్బులు డిమాండ్‌ చేసిన ఘటన ఆలస్యంగా వెలుగులోకి వచ్చింది. విశ్వసనీయ సమాచారం మేరకు.. ఎన్నికల కోడ్‌ అమలులోకి రావడంతో జిల్లా ఉన్నతాధికారులు ఫ్లయింగ్‌ స్క్వాడ్‌ను నియమించారు. ఈ బృందంలో పోలీసులు, రెవెన్యూ అధికారులతోపాటు మరి కొంతమంది సిబ్బంది ఉన్నారు. వారు తమ పరిధిలో వాహనాల తనిఖీలు చేస్తున్నారు. గత నెల 25న చిలమత్తూరు మండలానికి చెందిన ముగ్గురు రైతులు కర్ణాటకలోని సింధనూరు వెళ్లి 85 గొర్రెలను కొనుగోలు చేశారు. వాటిని వాహనంలో స్వగ్రామానికి తరలిస్తుండగా బెళుగుప్ప మండలం గుండ్లపల్లి వద్ద ఫ్లయింగ్‌ స్క్వాడ్‌ అధికారులు ఆపారు. కారులో కూర్చున్న అధికారి వద్దకు వెళ్లి మాట్లాడాలని గొర్రెల యజమానులకు సూచించారు. కారులో ఉన్న సదరు రెవెన్యూ అధికారి ఎన్నికల సమయంలో ఇన్ని గొర్రెలను తరలించరాదని, కేసు నమోదు చేయకుండా ఉండటానికి రూ.20 వేలు ఇవ్వాలని డిమాండ్‌ చేసినట్లు తెలిసింది. అయితే గొర్రెల యాజమానులు తెలిసిన వారి నుంచి ఫోన్‌ చేయించడంతో వారిని వదిలేసినట్లు సమాచారం. ఈ విషయం జిల్లా ఉన్నతాధికారుల దృష్టికి వెళ్లడంతో ఓ మహిళ అధికారిణితో విచారణ చేయించినట్లు తెలుస్తోంది. కాగా సదరు అధికారి తన తప్పును పోలీసుల మీదకు నెట్టే ప్రయత్నం చేసినట్లు సమాచారం. ఇప్పటికే రెవెన్యూ అధికారిపై పలు ఆరోపణలు ఉన్నా.. ఉన్నతాధికారులు చర్యలు తీసుకోవడంలో వెనుకంజ వేస్తున్నారనే విమర్శలు ఉన్నాయి.