జాలిలేని జగన్‌ మామ..

90 శాతం పూర్తయిన గురుకుల భవనాలపై ఇంత కక్షనా?

గుడిబండలో అర్ధాంతరంగా ఆగిన బాలికల గురుకుల పాఠశాల, కళాశాల భవనం పనులు

మడకశిర గ్రామీణం, గుడిబండ, న్యూస్‌టుడే: మారుమూల మడకశిర ప్రాంతంలో నిరుపేద విద్యార్థులకు కార్పొరేట్ తరహా విద్యను అందించాలనే సదుద్దేశంతో తెదేపా ప్రభుత్వ హయాంలో నియోజకవర్గానికి రెండు బీసీ గురుకుల పాఠశాలలు, కళాశాలలు మంజూరు చేయించారు. వాటి నిర్మాణానికి ఒక్కో భవనానికి రూ.27 కోట్ల వంతున కేటాయించారు. నియోజకవర్గంలోని మడకశిర మండలం గుండుమలలో మహాత్మాజ్యోతిబాఫులె బాలుర గురుకుల పాఠశాల, గురుకుల జూనియర్‌ కళాశాల, మండల కేంద్రమైన గుడిబండలో బాలికల గురుకుల పాఠశాల, జూనియర్‌ కళాశాలలు మంజూరుచేసి నిధులు విడుదల చేశారు. అప్పట్లో పనులు శరవేగంగా చేపట్టి 90 శాతం పూర్తి చేశారు.

గుండుమల వద్ద బాలుర గురుకుల భవన సముదాయం

వైకాపా అధికారంలోకి వచ్చాక గ్రహణం

వైకాపా ప్రభుత్వం అధికారంలోకి వచ్చాక గురుకులాల నిర్మాణాలకు గ్రహణం పట్టింది. అప్పటి నుంచి తట్టెడు సిమెంటు, ఇటుక వేయలేదు. ఒక్కో భవనానికి రూ.3 నుంచి రూ.5 కోట్ల మేర వెచ్చించి పూర్తిచేసి ఉంటే ఒక్కో విద్యాలయంలో 1,200 మంది విద్యార్థులు చదివేవారు. తెదేపాకు మంచిపేరు వస్తుందన్న అక్కసుతో జగన్‌ నిర్లక్ష్యం వహించారు. గుండుమల బాలుర గురుకుల పాఠశాలను మూడు విభాగాలుగా చేసి 5 నుంచి 7 వరకు ఆర్‌.అనంతపురం వద్ద ఓ భవనంలో, 8 నుంచి 10 వరకు మడకశిర డిగ్రీ కళాశాల భవన సముదాయంలోని కొన్ని గదుల్లో నిర్వహిస్తున్నారు. ఇంటర్‌ కళాశాలను ఎస్సీ బాలికల పాత హాస్టల్‌ భవనంలో అసౌకర్యాల నడుమ నిర్వహిస్తున్నారు. గుడిబండ బాలికల గురుకుల పాఠశాలను మడకశిర సమీపంలోని మెట్టిబండ ఆంజనేయస్వామి ఆలయ సమీపంలో ఓ భవనంలో, జూనియర్‌ కళాశాలను గుడిబండలోని బీసీ బాలుర పాత హాస్టల్‌ భవనంలో నిర్వహిస్తున్నారు.  నాడు-నేడు అంటూ విద్యాభివృద్ధికి రూ.కోట్లు వెచ్చించామని ప్రగల్బాలు పలికిన వైకాపా ప్రభుత్వం గురుకులాలపై నిర్లక్ష్యమెందుకని ప్రజలు ప్రశ్నిస్తున్నారు.