భారీగా నగదు పట్టివేత

స్వాధీనం చేసుకున్న నగదు

అనంత నేరవార్తలు, న్యూస్‌టుడే: అనంతపురం జిల్లా కేంద్రంలో మంగళవారం పోలీసుల తనిఖీల్లో భారీగా నగదు పట్టుబడింది. ఈ కేసుకు సంబంధించిన వివరాలను అనంత అర్బన్‌ డీఎస్పీ వీర రాఘవరెడ్డి మంగళవారం రాత్రి మీడియాకు వెల్లడించారు. జిల్లా కేంద్రంలోని విద్యుత్తు నగర్‌ కూడలిలో ఉదయం రెండో పట్టణ పోలీస్‌స్టేషన్‌ సీఐ క్రాంతికుమార్‌, ఎస్సై రుష్యేంద్రబాబు, ఫ్లయింగ్‌ స్క్వాడ్‌ టీం ఇన్‌ఛార్జి భీమలింగేశ్వర ఆధ్వర్యంలో పోలీసులు వాహనాల తనిఖీలు చేపట్టారు. అటువైపు వచ్చిన ఫార్చునర్‌ వాహనాన్ని పోలీసులు ఆపి తనిఖీ చేశారు. అందులో రెండు బ్యాగుల్లో తరలిస్తున్న రూ.1,99,97,500 నగదును పోలీసులు సీజ్‌ చేశారు. వాహనం రికార్డులను పరిశీలించగా కదిరి తెదేపా అసెంబ్లీ అభ్యర్థి కందికుంట వెంకటప్రసాద్‌ పేరున ఉన్నట్లు తేలింది. డ్రైవర్‌ వెల్లడించిన అంశాల ఆధారంగా పోలీసులు విచారణ చేస్తున్నారు. సీజ్‌ చేసిన నగదును టూటౌన్‌ పోలీసులు అనంతపురం ఎన్నికల రిటర్నింగ్‌ అధికారికి అప్పగించారు.