స్కానింగ్‌ కేంద్రాల్లో వైద్యాధికారుల తనిఖీలు

స్కానింగ్‌ కేంద్ర నిర్వాహకులు, వైద్యులతో మాట్లాడుతున్న డీఎంహెచ్‌వో శ్రీహరి

చిత్తూరు(వైద్యం): చిత్తూరు, పుత్తూరులోని పలు స్కానింగ్‌ కేంద్రాల్లో గురువారం డీఎంహెచ్‌వో శ్రీహరి ఆకస్మికంగా తనిఖీలు చేపట్టారు. నిబంధనల అతిక్రమణపై ఆగ్రహం వ్యక్తం చేసి మూడు స్కానింగ్‌ యంత్రాలు సీజ్‌ చేశారు. ప్రైవేటు స్కానింగ్‌ కేంద్రాల్లో లింగ నిర్ధారణ పరీక్షలు జరుగుతున్నాయని, వాటి ఫలితాలను అక్కడి నిర్వాహకులు బహిర్గతం చేస్తున్నారనే ఫిర్యాదులు అందడంతో దాడులు నిర్వహించారు. చిత్తూరులోని వీకేఆర్‌ స్కానింగ్‌ కేంద్రాన్ని తనిఖీ చేసి అక్కడ స్కానింగ్‌ యంత్రాలు పక్కన పెట్టినా అధికారులకు సమాచారం ఇవ్వకపోవడంపై ఆగ్రహం వ్యక్తం చేశారు. రికార్డులు లేకపోవడంపై ప్రశ్నించి, నిబంధనలు అతిక్రమిస్తే చర్యలు తప్పవని హెచ్చరించారు. మధు స్కానింగ్‌ కేంద్రాన్ని తనిఖీ చేసి అగ్నిప్రమాద నిరోధకాలు లేవని గుర్తించి ఆయా నిబంధనలు సైతం పాటించాలని ఆదేశించారు. పుత్తూరులోని ఓ స్కానింగ్‌ కేంద్రాన్ని తనిఖీ చేశారు.