గోరంట్ల ప్రచారంలో వైకాపా కవ్వింపు చర్యలు

చర్చనీయాంశమైన రౌడీషీటర్‌ వ్యవహారం

గోరంట్లతో వాగ్వాదానికి దిగిన వైకాపా కార్యకర్తలు

టి.నగర్‌, న్యూస్‌టుడే: రాజమహేంద్రవరం గ్రామీణం తెదేపా ఎమ్మెల్యే అభ్యర్థి గోరంట్ల బుచ్చయ్యచౌదరి ఎన్నికల ప్రచారంలో వైకాపా అనుయాయులు కవ్వింపు చర్యలకు పాల్పడ్డారు. శుక్రవారం 27వ డివిజన్‌లో గోరంట్లతో పాటు ఆయన కుమార్తె శిరీష ప్రచారంలో పాల్గొన్నారు. వైకాపాకి చెందిన స్థానిక రౌడీషీటరు కొంతమంది మహిళలను తీసుకొని వచ్చారు. గోరంట్ల ఇంటింటికీ వెళ్లి ఓటు వేయాల్సిందిగా అభ్యర్థిస్తున్న సమయంలో ఓ మహిళ తిరగబడింది. తమ వీధిలో ఎలా ప్రచారం చేస్తారంటూ అసభ్య పదజాలంతో నిలదీసింది. అధికార పార్టీకి చెందిన కొంతమంది వ్యక్తులు గోరంట్లతో వాగ్వాదానికి దిగారు. దీనిపై తెలుగు మహిళలు రెండో పట్టణ పోలీస్‌ స్టేషన్‌లో ఫిర్యాదు చేశారు. కాగా సదరు రౌడీషీటరు తెదేపాలో చేరేందుకు కోరగా, అలాంటి వారికి చోటులేదంటూ ఇటీవల గోరంట్ల తోసిపుచ్చడంతో ప్రస్తుతం కావాలని ఇలా కవ్వింపు చర్యలకు పాల్పడినట్లు పలువురు చెబుతున్నారు.