నూతన భూహక్కు చట్టంపై జగన్‌ సర్కారునే ప్రశ్నించాలి

దీనిని అమలు చేయమని నీతిఆయోగ్‌ ఎక్కడా చెప్పలేదు  
భాజపా రాష్ట్ర అధ్యక్షురాలు పురందేశ్వరి

రాజమహేంద్రవరం నగరపాలక సంస్థ: ఏపీ నూతన భూహక్కు చట్టం అమలుపై జగన్‌మోహన్‌రెడ్డి సర్కారును ప్రశ్నించాలని భాజపా రాష్ట్ర అధ్యక్షురాలు దగ్గుబాటి ఫురందేశ్వరి అన్నారు. రాజమహేంద్రవరంలో ఆదివారం ఆమె మాట్లాడుతూ నీతిఆయోగ్‌ ల్యాండ్‌ టైటిలింగ్‌ యాక్ట్‌ను కేవలం సూచించిందన్నారు. దీన్ని అమలు చేయమని, కచ్చితంగా చట్టం ఉండాలని చెప్పలేదన్నారు. అమలు విషయంలో ఆయా రాష్ట్రాలే నిర్ణయం తీసుకోవాలన్నారు. ఆంధ్రప్రదేశ్‌లో అమలు చేస్తున్నారనే దానిపై ఆ రాష్ట్ర ప్రభుత్వమే వివరణ ఇవ్వాలన్నారు. కావాలనే ఈ చట్టంపై అసత్య ప్రచారం చేస్తున్నారంటూ వైకాపా నేతలు ఆరోపిస్తున్నారని విలేకరులు అడిగిన ప్రశ్నకు ఆమె స్పందించారు. భాజపా అధికారంలోకి రాగానే ముస్లింల 4 శాతం రిజర్వేషన్లు తొలగిస్తున్నామని అధికార పార్టీ నేతలు తనపైన కూడా అసత్య ప్రచారాలు చేశారని గుర్తుచేశారు. సోమవారం రాజమహేంద్రవరంలో జరగనున్న ప్రధానమంత్రి మోదీ పర్యటనను విజయవంతం చేయాలని ఆమె శ్రేణులకు పిలుపునిచ్చారు. సార్వత్రిక ఎన్నికల నేపథ్యంలో ప్రధాని ప్రసంగం ద్వారా రాష్ట్రానికి దశ-దిశ నిర్దేశం చేయనున్నారని వివరించారు.