Andhra News: పట్టాలపై తెగిపడిన విద్యుత్తు తీగలు.. పలుచోట్ల రైళ్ల రాకపోకలకు అంతరాయం

వేటపాలెం: బాపట్ల జిల్లా వేటపాలెం రైల్వేస్టేషన్‌కు సమీపంలో ఉన్న సంతరావూరు రైల్వే గేటు వద్ద గూడూరు- విజయవాడ రైల్వే ట్రాక్‌పై శనివారం రాత్రి 11.30 గంటల సమయంలో హైటెన్షన్‌ విద్యుత్తు తీగలు తెగి, అప్‌లైన్‌(విజయవాడ-చెన్నై ట్రాక్‌) పై పడ్డాయి. దీంతో ఆ మార్గంలో రైళ్ల రాకపోకలు నిలిచిపోయాయి. దీనివల్ల చీరాల రైల్వే స్టేషనులో పాట్నా-ఎర్నాకుళం సూపర్‌ఫాస్ట్‌ ఎక్స్‌ప్రెస్, ఇదే ట్రాక్‌పై చీరాలకు మధ్యలో సంఘమిత్ర ఎక్స్‌ప్రెస్, వేటపాలెం- చినగంజాం మధ్య పద్మావతి ఎక్స్‌ప్రెస్, ఒంగోలు రైల్వే స్టేషనులో చార్మినార్‌, డీటీ ఎక్స్‌ప్రెస్‌లు నిలిచిపోయాయి. విద్యుత్తు తీగలు తెగడం వల్ల విజయవాడ-చెన్నై-విజయవాడ మార్గంలో పలు చోట్ల రైళ్ల రాకపోకలకు అంతరాయం ఏర్పడింది. సమాచారం తెలుసుకున్న రైల్వే అధికారులు సంఘటన స్థలానికి చేరుకొని పునరుద్ధరణ చర్యలు చేపట్టారు. ప్రస్తుతం వేటపాలెం రైల్వేస్టేషనులో అప్‌లైనులో మరమ్మతులు పూర్తయ్యాయి. డౌన్‌లైనులో మరమ్మతులు చేశారు.