కాంగ్రెస్‌లోకి కోలారు నేతలు

రాహుల్‌ సమక్షంలో కాంగ్రెస్‌లో చేరిన కొత్తూరు మంజునాథ్‌, ఎంసీ సుధాకర్‌ తదితరులు

చింతామణి, యశ్వంతపుర, చింతామణి, న్యూస్‌టుడే : కోలారు జిల్లాకు చెందిన మాజీ శాసనసభ్యుడు కొత్తూరు మంజునాథ్‌ (ముళబాగిలు), డాక్టర్‌ ఎం.సి.సుధాకర్‌ (చింతామణి) బుధవారం కాంగ్రెస్‌ పార్టీలో చేరారు. ఆ ఇద్దరూ బుధవారం దిల్లీలో కాంగ్రెస్‌ యువనేత రాహుల్‌గాంధీ, ప్రతిపక్ష నేత సిద్ధరామయ్య, పీసీసీ అధ్యక్షుడు డీకే శివకుమార్‌, ఏఐసీసీ ప్రధాన కార్యదర్శులు ఎంసీ వేణుగోపాల్‌, రణదీప్‌సింగ్‌ సుర్జేవాలా సమక్షంలో కాంగ్రెస్‌ పతాకాన్ని అందుకున్నారు. ఈ కార్యక్రమంలో శాసనసభ్యులు రమేష్‌కుమార్‌, నాసీర్‌ అహ్మద్‌, శివశంకర్‌రెడ్డి, నంజేగౌడ, అనిల్‌కుమార్‌, నారాయణస్వామి, శ్రీనివాస్‌గౌడ తదితరులు పాల్గొన్నారు.

* ఏఐసీసీ మాజీ అధ్యక్షుడు రాహుల్‌గాంధీ ఆగస్టు 3న రాష్ట్రానికి రానున్నారు. ఆరోజు దావణగెరెలో నిర్వహించే ప్రతిపక్ష నేత సిద్ధరామయ్య 75వ పుట్టిన రోజు వేడుకల్లో పాల్గొంటారు. ఓ బహిరంగ సభలోనూ ప్రసంగిస్తారు. ‘నా మిత్రులు, అభిమానులు అక్కడే పుట్టిన రోజు వేడుకలు చేయాలని నిర్ణయించారు. ఆ కార్యక్రమానికి మీరూ వస్తే బాగుంటుందని రాహుల్‌గాంధీకి సూచించా. ఆయన పెద్ద మనసుతో ఒప్పుకొన్నారు’ అని సిద్ధరామయ్య వివరించారు. పార్టీ తరఫున ఆరోజు జనసేకరణకూ ముందడుగు వేసే అవకాశాలున్నాయని సమాచారం.