కుక్కర్‌ బాంబు నిందితుడి ఆరోగ్యం మెరుగు

బెంగళూరు (శివాజీనగర), న్యూస్‌టుడే : మంగళూరు కంకనాడి సమీపంలో కుక్కర్‌ బాంబు పేలుడు ఘటనలో ఒళ్లు కాల్చుకున్న అనుమానిత తీవ్రవాది మహ్మద్‌ షారిఖ్‌ పూర్తిగా కోలుకున్నాడు. ఆ వ్యక్తికి బెంగళూరు విక్టోరియా ఆసుపత్రిలో గత నెల ప్లాస్టిక్‌ సర్జరీ, మరికొన్ని శస్త్రచికిత్సలను నిర్వహించారు. పూర్తి పోలీసు భద్రత మధ్య, ప్రత్యేక వార్డులో చికిత్స అందించారు. కాలిన గాయాలన్నీ పూర్తిగా నయమయ్యాయి. కొన్ని చిన్నగాయాలు ఉన్నాయని వైద్యులు తెలిపారు. వచ్చే వారం అతన్ని ఆసుపత్రి నుంచి డిస్‌ఛార్జ్‌ చేయనున్నారు. నిందితుడిని అదుపులోకి తీసుకుని విచారించేందుకు జాతీయ తనిఖీ దళం అధికారులు సన్నాహాలు చేసుకున్నారు. ఎన్‌ఐఏ అధికారులు బెంగళూరులోనే షారిఖ్‌ను విచారణ చేయనున్నారు.