దేవుడి తోడు.. మేం ఓటెయ్యం!

ఓ కూడలిలో ఏర్పాటు చేసిన ఫ్లెక్సీని చూపుతున్న గ్రామస్థులు

‘ఎన్నికలొచ్చిన ప్రతిసారీ హామీలివ్వటం.. ఆపై ప్రతిజాప్రతినిధులు మోసగించటం షరామామూలైంది. మా గ్రామాన్ని అధికారులు, నేతలెవరూ పట్టించుకోవడం లేదు. అందుకే.. దేవుడిపై ఒట్టు.. ఈసారి ఎన్నికల్లో పోలింగ్‌కు దూరంగా ఉంటాం’ అని చుంచుపల్లి మండలం గరిమెళ్లపాడు పంచాయతీ వాసులు ఏర్పాటుచేసిన ఫ్లెక్సీలు   అధికారులను కదిలించాయి. గ్రామాన్ని ఆర్డీఓ మధు, డీఎస్పీ అబ్దుల్‌ రెహ్మాన్‌ గురువారం  సందర్శించారు. స్థానికులతో సమస్యలపై మాట్లాడారు. సమస్యలుంటే అధికారులను కలిసి విన్నవించుకోవాలని.. ఓటేయబోమని తీర్మానించడం సరికాదని నచ్చజెప్పారు. ఓటుహక్కు వినియోగించుకుంటామని గ్రామస్థులు చెప్పడంతో అధికారులు    వెనుదిరిగి వెళ్లారు. తహసీల్దార్‌ కృష్ణ, ఎంపీడీవో చంద్రశేఖర్‌రావు, ఎంపీవో సత్యనారాయయణ పాల్గొన్నారు.

చుంచుపల్లి, న్యూస్‌టుడే