ఆదరిస్తే అండగా నిలుస్తా: తాండ్ర

కారేపల్లి: రోడ్‌షోలో పాల్గొన్న భాజపా అభ్యర్థి వినోద్‌రావు

కారేపల్లి, న్యూస్‌టుడే: లోక్‌సభ ఎన్నికల్లో తనను గెలిపిస్తే ప్రజలకు అండగా నిలుస్తానని భాజపా అభ్యర్థి తాండ్ర వినోద్‌రావు అన్నారు. కారేపల్లిలో గురువారం నిర్వహించిన రోడ్‌షోలో ఆయన మాట్లాడారు. ప్రధాని మోదీ స్ఫూర్తితో రాజకీయాల్లోకి వచ్చానని, తాను రైతుబిడ్డననే అని గుర్తుచేశారు. ఇన్నాళ్లు ఇక్కడ గెలిచిన నాయకులకు చిత్తశుద్ధి లేకపోవటంతో ఏ రంగంలోనూ ఖమ్మం జిల్లా అభివృద్ధికి నోచుకోలేదని తెలిపారు. కాంగ్రెస్‌ నాయకులు తమ కుటుంబ, బంధువర్గాలకు పదవులు ఇప్పించుకోవటానికి ఆరాటపడతారే తప్ప ప్రజలకు మేలు చేయబోరని విమర్శించారు. కాకతీయ వంశస్థుడు, బస్తర్‌ మహారాజ్‌ కమల్‌చంద్ర భంజ్‌దేవ్‌, శ్యాంరాథోడ్‌, నెల్లూరి కోటేశ్వరరావు, అరుణ, మండలాధ్యక్షుడు శ్రీను, తురక నారాయణ, అజ్మీర వీరన్న, కల్తి రాంప్రసాద్‌, సుజాత, తెదేపా నాయకులు పాల్గొన్నారు.