వారం రోజుల్లో కనీస వసతులు

కలెక్టర్‌ కోటేశ్వరరావు

గోనెగండ్ల, న్యూస్‌టుడే: జగనన్న కాలనీల్లో వారం రోజుల్లో కనీస వసతులు కల్పించాలని కలెక్టర్‌ కోటేశ్వరరావు అన్నారు. గోనెగండ్లలోని జగనన్న కాలనీల్లో గృహ నిర్మాణాలను శనివారం ఆయన పరిశీలించారు.కాలనీలో సమస్యలపై లబ్ధిదారులు కలెక్టర్‌కు మొరపెట్టుకున్నారు. నీటి సమస్య, రహదారి సౌకర్యం లేక ఇబ్బంది పడుతున్నామన్నారు. కట్టించిన ఇళ్లకు సక్రమంగా క్యూరింగ్‌ చేయలేకపోతున్నామని ఆవేదన వ్యక్తం చేశారు. కలెక్టర్‌ స్పందించి వారం రోజుల్లో కాలనీలో రహదారులు, నీటి సౌకర్యం కల్పించాలని ఎంపీడీవో ప్రవీణ్‌కుమార్‌ను ఆదేశించారు. వీలైనంత త్వరగా విద్యుత్తు లైన్‌ మార్చాలని ఏఈ సుధాకర్‌రావుకు ఆయన సూచించారు. ఈ కార్యక్రమంలో తహసీల్దారు వేణుగోపాల్‌, హౌసింగ్‌ ఏఈ లక్ష్మన్న, తదితరులు పాల్గొన్నారు.