శత్రువులనుకున్నాం..సోదరులై ప్రేమను పంచారు

ఎస్పీకి రాఖీ కట్టిన లొగిపోయిన మహిళా మావోయిస్టులు

ఎస్పీకి రాఖీ కడుతున్న రాధా మడ్కామి

మల్కాన్‌గిరి, న్యూస్‌టుడే: మల్కాన్‌గిరి జిల్లాలో పోడియా, కలిమెల దళాల్లో పని చేసిన నంగి కవాసి, రాధా మడ్కామి అనే ఇద్దరు మహిళా మావోయిస్టులు మూడేళ్ల క్రితం పోలీసుల ఎదుట లొంగిపోయారు. అనంతరం ప్రభుత్వ ప్రోత్సాహంతో వ్యవసాయం చేసుకుంటున్న వీరు శుక్రవారం ఎస్పీ నితీశ్‌ వాద్వానీకి రాఖీ కట్టారు. ఈ సందర్భంగా ఇద్దరూ మాట్లాడుతూ.. పోలీసులంటే పడేది కాదని, ఎన్నో సార్లు వారిపై దాడి చేసి హతమార్చామన్నారు. తాము శత్రువులుగా చూసిన వారే ఈ రోజు అన్నలుగా ప్రేమను పంచుతున్నారన్నారు. ‘అడవుల్లో ఉన్న అక్కల్లారా, చెల్లెల్లారా హింసను వీడండి. జన జీవన స్రవంతిలో కలవండి’ అని మహిళా మావోయిస్టులకు పిలుపునిచ్చారు.