ఖేలో ఇండియా యూత్‌ గేమ్స్‌లో రాష్ట్ర లిఫ్టర్లకు పతకాలు

పతకాలతో జోత్స్న సబర్‌, ప్రీతిశ్మిత భొయి

బ్రహ్మపుర క్రీడలు, న్యూస్‌టుడే: మధ్యప్రదేశ్‌లోని ఇండోర్‌లో కొనసాగుతున్న ఖేలో ఇండియా-2023 యూత్‌ గేమ్స్‌లో సోమవారం నుంచి జాతీయస్థాయి వెయిట్ లిఫ్టింగ్‌ పోటీలు ప్రారంభమయ్యాయి. ఇందులో రాష్ట్రానికి చెందిన ఇద్దరు మహిళా లిఫ్టర్లు రెండు పతకాలు గెలుచుకున్నట్లు రాష్ట్ర లిఫ్టింగ్‌ కోచ్‌, అర్జున అవార్డు గ్రహీత కె.రవికుమార్‌ చెప్పారు. ఆయన సాయంత్రం ‘న్యూస్‌టుడే’కు ఫోనులో ఆ వివరాలు తెలిపారు. తొలిరోజు పోటీల్లో మహిళల 40 కిలోల శరీరబరువు కేటగిరీలో జ్యోత్స్న సబర్‌ స్నాచ్‌లో 53 కిలోలు, క్లీన్‌జర్క్‌లో 65 కిలోలు బరువులెత్తి రజత పతకాన్ని గెలుచుకుందని చెప్పారు. ప్రీతిశ్మిత భొయి అనే మరో లిఫ్టరు స్నాచ్‌లో 53 కిలోలు, క్లీన్‌జర్క్‌లో 64 కిలోలు బరువులెత్తి తృతీయ స్థానంలో నిలిచి కాంస్య పతకాన్ని గెలుచుకుందని రవికుమార్‌ తెలిపారు.