జగన్నాథుని ‘ఖొసాపొడ’ గోప్యసేవలు

పురుషోత్తముని దివ్యమంగళ రూపం

గోపాల్‌పూర్‌, న్యూస్‌టుడే: పూరీ శ్రీక్షేత్రంలో సోమవారం జగన్నాథునికి ‘ఖొసాపొడ’ గోప్యసేవలు నిర్వహించారు. సాయంత్రం 5 గంటల నుంచి రాత్రి 10 వరకు గర్భగుడి తలుపులు మూసేసి ఈ గోప్యసేవ చేశారు. దీన్ని దృష్టిలో పెట్టుకున్న యంత్రాంగం ఉదయం నుంచే ఈ విషయాన్ని మైకుల ద్వారా ప్రకటించి దర్శనాలు ఉండవని భక్తులకు తెలిపింది. పురుషోత్తమ, బలభద్ర, సుభద్రల విగ్రహాలు కర్రతో చేసినవి కావడంతో సంరక్షణకు కొన్ని రకాల లేపనాలు పూస్తారు. ఈ కార్యక్రమం అరుదుగా జరుగుతుంది. దీన్ని ‘ఖొసాపొడ’ సేవగా పేర్కొంటారు.

బడ్జెట్‌ రూపకల్పన... శ్రీక్షేత్ర యంత్రాంగం 2023-24 సంవత్సరం బడ్జెట్‌ పద్దుల రూపకల్పన చేసింది. ఈ ఏడాదిలో రూ.300.79 కోట్ల ఆదాయం, రూ.262.49 కోట్ల వ్యయం అవుతుందని అంచనా వేసింది. శ్రీక్షేత్ర పాలనాధికారి వీర్‌విక్రం సింగ్‌ యాదవ్‌ దీనిపై విలేకరులతో మాట్లాడుతూ... త్వరలో పాలకవర్గం సమావేశం జరగనుందని, బడ్జెట్‌ పద్దులపై కూలంకష చర్చ తర్వాత అధికారికంగా తెలియజేస్తామన్నారు.