గుంతలు తీశారు.. ప్రమాదాలకు వదలారు!

కొత్తవలసలోని ఉన్నత పాఠశాల మైదానం ముందున్న రహదారి వాహనదారులకు ప్రమాదకరంగా మారింది. బుధవారం ఈ రోడ్డులో ఓ ద్విచక్రవాహనం ఇరుక్కుపోయింది. కొత్తవలస నుంచి విజయనగరం వరకు ఉన్న రోడ్డు పక్కన కొన్ని నెలల కిందట ఓ టెలికాం కంపెనీ లైన్లు వేసే పనులు చేపట్టింది. అప్పట్లో తీసిన గుంతలు ఇంకా పూడ్చలేదు. దీంతో ద్విచక్ర వాహనదారుడు రోడ్డు పక్క నుంచి వెళ్తూ గుంతను గమనించక.. అందులో చిక్కుకుపోయాడు. అతని బైక్‌ ముందు భాగం అమాంతంగా గుంతలోకి వెళ్లిపోయింది. చోదకుడు స్వల్పగాయాలతో బయటపడ్డారు. దీనిపై ఆర్‌అండ్‌బీ ఇంజినీర్‌ శ్రీనివాసరావు మాట్లాడుతూ.. పూడ్చాల్సిన బాధ్యత సదరు సంస్థదేనని, వెంటనే పనులు చేయాలని ఆదేశిస్తామన్నారు.

న్యూస్‌టుడే, కొత్తవలస