విద్యుదాఘాతంతో రెండు గోవులు మృతి

బలిజిపేట: మండలంలోని అంపావల్లి గ్రామం రాజు చెరువు పొదల్లో పైలెట్‌ ప్రాజెక్టుకు విద్యుత్తు సరఫరా చేస్తున్న ఎల్‌టీ న్యూట్రల్‌ వైరు తెగి భూమిపై పడింది. ఈ సమయంలో గడ్డి పొదల్లో మేస్తున్న రెండు ఆవులు శనివారం సాయంత్రం విద్యుదాఘానికి గురై మృతి చెందాయి. ఈ ప్రమాదంలో గ్రామానికి చెందిన టొంపల రాంబాబు, అప్పారావులకు చెందిన సుమారు రూ.70వేలు విలువైన ఆవులు మృతి చెందాయని బాధితరైతులు తెలిపారు. విద్యుత్తు లైను తెగినందున ప్రమాదం జరిగిందని వారు తెలిపారు. ఈ అంశంపై ట్రాన్స్‌కో ఏఈ సింహాచలాన్ని ‘న్యూస్‌టుడే’ వివరణ కోరగా, తాగునీటి సరఫరా పథకానికి వెళ్తున్న వైర్లలో న్యూట్రల్‌ వైరు దట్టంగా ఉన్న గడ్డి పొదల్లో తెగినందున తెలియలేదని, దీంతో ప్రమాదం జరిగిపోయిందన్నారు. ఫేజు వైరు తెగితేనే మంట వస్తుందని, ఈ విషయం తెలిసిన వెంటనే సవరించామన్నారు.