సచివాలయం ఉద్యోగులు అందుబాటులో ఉండాలి

బలిజిపేట: బలిజిపేట మండలంలోని వంతరాం గ్రామ సచివాలయంలో పనిచేస్తున్న ఉద్యోగులను ప్రజలకు అందుబాటులో ఉంచాలని గ్రామప్రజలు అధికారులను అభ్యర్థించారు. గడిచిన కొద్ది రోజులుగా ఈ సచివాలయంలో పనిచేస్తున్న ప్రధానశాఖల ఉద్యోగులెవ్వరూ ఇక్కడకు సక్రమంగా హాజరుకాకుండా విధులకు గైర్హాజరవుతున్నారని ప్రజలు ఆరోపిస్తున్నారు. గురువారం ఇక్కడ పనిచేసిన ఉద్యోగుల్లో ఇద్దరు బలిజిపేట తహసీల్దారు కార్యాలయంలో నిర్వహించిన ఎన్నికల సమావేశానికి వెళ్లగా, మిగతా సిబ్బంది విధులకు హాజరుకాలేదు. దీంతో ఈ సచివాలయం కుర్చీలన్నీ ఖాళీగానే కన్పిస్తున్నాయన్నారు. ఇందుకు సంబంధించిన చిత్రాలను కూడా ప్రజలు వాట్సాప్‌ ద్వారా మీడియాకు గురువారం పంపించారు. గ్రామంలోని ప్రజలకు పంచాయతీ కార్యదర్శి ఎవరో తెలియదన్నారు. ఈ అంశంపై ఎంపీడీవో రమేష్‌నాయుడును ‘న్యూస్‌టుడే’ వివరణ కోరగా, వారానికొకరోజు సచివాలయాల సందర్శన కార్యక్రమాన్ని చేపడుతున్నామని, గతవారం వంతరాం సచివాలయానికి వెళ్లామని, కొంతమంది సిబ్బంది ఆలస్యంగాను, కొంతమంది గైర్హాజరవుతున్నట్టు తేలిందన్నారు. వీరిని గాడిలో పెట్టేందుకు చర్యలు చేపడతామని ఆయన వివరణ ఇచ్చారు.