ఫిర్యాదుల సత్వర పరిష్కారానికి చర్యలు

ఫోన్‌ ద్వారా సమస్యలు తెలుసుకుంటున్న కలెక్టర్‌ ప్రవీణ్‌కుమార్‌..
చిత్రంలో జేసీలు చేతన్, విశ్వనాథన్‌

ఒంగోలు గ్రామీణం, న్యూస్‌టుడే: ప్రజలు ప్రస్తావించిన సమస్యలు, ఫిర్యాదులను నిబంధనల మేరకు సత్వరమే పరిష్కరించాలని కలెక్టర్‌ ప్రవీణ్‌ కుమార్‌ అధికారులను ఆదేశించారు. స్థానిక ప్రకాశం భవన్‌లోని ఛాంబర్‌లో సోమవారం ఉదయం 10.30 నుంచి 11.30 గంటల వరకు ‘డయల్‌ యువర్‌ కలెక్టర్‌’ కార్యక్రమాన్ని నిర్వహించారు. ఈ సందర్భంగా సమస్యలను విన్న ఆయన వాటిని త్వరితగతిన పరిష్కరించేలా చర్యలు తీసుకుంటామని చెప్పారు. కార్యక్రమంలో జేసీలు చేతన్, విశ్వనాథన్, డీఆర్వో పులి శ్రీనివాసులు తదితరులు పాల్గొన్నారు. 
* అద్దంకి మండలం కొటికలపూడి ఎన్నెస్పీ కాలువ భూములను కొందరు ఆక్రమించి దుకాణాలు నిర్మించారని అదే గ్రామానికి చెందిన వేణు ఫిర్యాదు చేశారు. అద్దంకి తహసీల్దార్, ఎన్నెస్పీ డీఈతో కలెక్టర్‌ వెంటనే ఫోన్‌లో మాట్లాడి పరిష్కారానికి సూచనలు చేశారు. 
* సింగరాయకొండలో జనావాసాల మధ్య ప్రైవేట్‌ వ్యక్తులు పశువుల సంత నిర్వహిస్తుండటంతో అపరిశుభ్ర వాతావరణం నెలకొంటోందని.. అనారోగ్య సమస్యలు తలెత్తుతున్నాయని అబ్దుల్‌ ఖాదర్‌ ఫిర్యాదు చేశారు.
* పుల్లలచెరువు మండలం గంగవరానికి చెందిన పార్వతి తన తాత పేరు మీద ఉన్న వ్యవసాయ భూమిని 2019లో అప్పటి తహసీల్దార్‌ ఇతరుల పేరు మీద ఆన్‌లైన్‌లో నమోదు చేసినట్లు ఫిర్యాదు చేశారు. పరిశీలించి చర్యలు తీసుకోవాలని మార్కాపురం ఆర్డీవోను కలెక్టర్‌ ఆదేశించారు. 
* మురుగు నీటి సమస్యతో పాటు పందుల సంచారంతో ఇబ్బందులు పడుతున్నామని ఒంగోలు నగర పరిధిలోని పేర్నమిట్ట సమీపంలోని లింగారెడ్డి కాలనీకి చెందిన రవికుమార్‌ కలెక్టర్‌ దృష్టికి తీసుకొచ్చారు.