ఐ ప్యాక్‌ సర్వేలన్నీ బోగస్‌

నాపై అనవసరంగా వక్రీకరణ రాతలు: ఎంపీ అభ్యర్థి లావు 

రొంపిచర్ల, న్యూస్‌టుడే: రాష్ట్రంలో వైకాపా పనైపోయిందని, ఐప్యాక్‌ సర్వేలన్నీ బోగస్‌ అని నరసరావుపేట కూటమి ఎంపీ అభ్యర్థి లావు శ్రీకృష్ణదేవరాయలు అన్నారు. రొంపిచర్ల మండలంలో శుక్రవారం ఆయన ఎన్నికల ప్రచారంలో పాల్గొన్నారు. ఈ సందర్భంగా విలేకర్లతో మాట్లాడుతూ రెండురోజుల నుంచి సామాజిక మాధ్యమాల్లో తనపై వైకాపా వారు చేస్తున్న అసత్య ప్రచారాల్ని ఖండించారు. వైకాపా సిద్ధం సభలకు రూ.700 కోట్లు ఖర్చు చేసిందని, అయినా జనం రాక గ్రాఫిక్స్‌ చేసి.. ప్రజలను మాయ చేస్తున్నారని విమర్శించారు. ఆ పార్టీ కోసం పనిచేస్తున్న ఐ-పాక్‌ బృందం సర్వేలన్నీ బోగస్‌ అని, వాళ్లు చేసే ప్రచారాలన్నీ అసత్యమేనని చెప్పారు. తనపై చేస్తున్న అసత్య ప్రచారాలను ప్రజలు నమ్మే పరిస్థితి లేదన్నారు. తాను తన కష్టాన్ని నమ్ముకుని, పల్నాడు ప్రజల ఆశీస్సులతో ముందుకు వెళ్తున్నానని అన్నారు.