గొంతు కోసుకుని.. భవనం పైనుంచి దూకి

 చికిత్స పొందుతూ మతిస్థిమితం లేని వ్యక్తి దుర్మరణం

ఒంగోలు నేరవిభాగం, న్యూస్‌టుడే: కొత్తపట్నం మండలం మోటుమాల గ్రామానికి చెందిన పురిణి బ్రహ్మయ్య(38)కు మతిస్థిమితం అంతంతమాత్రం. ఈ నెల 12న పెళ్లూరు సమీపంలో బ్లేడుతో గొంతు కోసుకుని ఆత్మహత్యాయత్నం చేశాడు. విషయం తెలుసుకున్న కుటుంబీకులు అతన్ని చికిత్స నిమిత్తం ఒంగోలులోని ఒక ప్రైవేట్‌ వైద్యశాలలో చేర్పించారు. అక్కడ చికిత్స పొందుతూ ఈ నెల 14వ తేదీ తెల్లవారుజామున వైద్యశాల భవనం పైనుంచి కిందకు దూకాడు. కాళ్లూ చేతులు విరిగిపోవటంతో పాటు తలకు బలమైన గాయమైంది. దీంతో అతన్ని నగరంలోనే మరొక వైద్యశాలకు తరలించారు. ప్రథమ చికిత్స అనంతరం గుంటూరు జీజీహెచ్‌కు తీసుకెళ్లారు. అక్కడ చికిత్స పొందుతూ బ్రహ్మయ్య సోమవారం తెల్లవారుజామున మృతి చెందాడు. వైద్యశాల నుంచి వచ్చిన సమాచారం మేరకు ఒంగోలు రెండో పట్టణ పోలీసులు కేసు నమోదు చేసి దర్యాప్తు చేస్తున్నారు.