ఓటమి భయంతోనే చెవిరెడ్డి బెదిరింపులు

యర్రగొండపాలెం పట్టణం, న్యూస్‌టుడే: ‘మాపై ఉల్లంఘన కేసులు నమోదు చేస్తే మీకే నష్టమంటూ మహిళా రిటర్నింగ్‌ అధికారిణిని వైకాపా ఒంగోలు ఎంపీ అభ్యర్థి చెవిరెడ్డి భాస్కర్‌రెడ్డి బెదిరింపులకు గురిచేయడంపై భాజపా రాష్ట్ర కార్యవర్గ సభ్యుడు ఆరె రమణయ్య ఆగ్రహం వ్యక్తం చేశారు. యర్రగొండపాలెంలో ఆయన గురువారం విలేకరులతో మాట్లాడారు. జనాదరణ లేకపోవడంతో వైకాపా అభ్యర్థులకు ఓటమి భయం పట్టుకుందన్నారు. దీంతో ఓటర్లను ప్రలోభాలకు గురిచేస్తున్నారని పేర్కొన్నారు. అడ్డదారులు తొక్కడాన్ని అడ్డుకుంటున్న అధికారులను ఆ పార్టీ నేతలు బెదిరింపులకు గురిచేస్తున్నారని విమర్శించారు. యర్రగొండపాలెం ఆర్వోను బెదిరించిన చెవిరెడ్డిపై ఎన్నికల కమిషన్‌ వెంటనే చర్యలు తీసుకోవాలని కోరారు. ఆర్వో కార్యాలయంలో వీడియో తీయడాన్ని బలవంతంగా ఆపి వేయించి బెదిరింపులకు  పాల్పడడం ప్రజాస్వామ్యానికి విరుద్ధమన్నారు.