స్వయం ఉపాధి కల్పనకు ప్రభుత్వం తోడ్పాటు

ఒంగోలు గ్రామీణం, న్యూస్‌టుడే: నిరుద్యోగ యువతకు స్వయం ఉపాధి కల్పించేందుకు ‘జగనన్న బడుగు వికాసం’ పథకం ద్వారా ప్రభుత్వం అండగా నిలుస్తుందని కలెక్టర్‌ దినేష్‌కుమార్‌ తెలిపారు. పథకం కింద ఎంపికైన ఎస్సీ, ఎస్టీ లబ్ధిదారులకు 45 శాతం రాయితీపై ప్రభుత్వం మంజూరు చేసిన మూడు కార్లు, రెండు మినీ ట్రక్కులను శనివారం పంపిణీ చేశారు. అర్హులైనవారు పథకాన్ని సద్వినియోగం చేసుకోవాలని కోరారు. కార్యక్రమంలో జడ్పీ ఛైర్‌పర్సన్‌ బూచేపల్లి వెంకాయమ్మ, ఒంగోలు నగర పాలక సంస్థ మేయర్‌ గంగాడ సుజాత, ఎల్‌డీఎం యుగంధర్‌, డీఆర్డీఏ పీడీ బాబూరావు, మెప్మా పీడీ రవికుమార్‌ తదితరులు పాల్గొన్నారు.