విద్వేష శక్తులకు ఇక్కడ చోటులేదు: సీఎం

గాంధీ విగ్రహానికి నివాళి అర్పించిన గవర్నర్‌ రవి, సీఎం స్టాలిన్‌ తదితరులు

చెన్నై, న్యూస్‌టుడే: విద్వేష శక్తులకు రాష్ట్రంలో చోటులేదని ముఖ్యమంత్రి స్టాలిన్‌ తెలిపారు. మహాత్మాగాంధీ జయంతి సందర్భంగా ఎగ్మూరులోని ప్రభుత్వ మ్యూజియం ప్రాంగణంలో ఉన్న ఆయన విగ్రహానికి ఆదివారం గవర్నర్‌ రవి, ముఖ్యమంత్రి స్టాలిన్‌ పుష్పాంజలి ఘటించారు. రాష్ట్ర ప్రభుత్వం తరఫున మంత్రులు, అధికారులు, మేయర్‌ తదితరులు కూడా నివాళి అర్పించారు. సర్వోదయ సంఘం విద్యార్థులు నిర్వహించిన భజన, రాట్నంలో నూలు వడికే ప్రదర్శనను గవర్నర్‌, సీఎం తిలకించారు. ఈ సందర్భంగా ముఖ్యమంత్రి ఓ ట్వీట్‌ చేశారు. విభేదాలు అధిగమించి ప్రేమ, శాంతిని వెలుగొందించే సమాజంగా భారత్‌ను రూపొందించడానికి మహాత్మాగాంధీ కృషి చేశారని తెలిపారు. ఆయన జయంతి రోజు ఈ గడ్డపై సమానత్వం, సోదరభావం నెలకొనాలని ఆకాంక్షించారు. విద్వేషాలు రెచ్చగొట్టే శక్తులకు ఇక్కడ చోటులేదన్నారు. ఇది గాంధీ నేలగా ప్రతిజ్ఞ చేద్దామని పిలుపునిచ్చారు. నగరంలోని గ్రామోద్యోగ్‌ భవన్‌లో ఉన్న గాంధీ చిత్రపటానికి గవర్నర్‌ నివాళి అర్పించారు. తర్వాత ఖాదీ చీరల విక్రయాలను ప్రారంభించారు. కార్యక్రమంలో మంత్రి గాంధీ తదితరులు పాల్గొన్నారు. రాజ్‌భవన్‌ ప్రాంగణంలో గాంధీ చిత్రపటానికి గవర్నర్‌ రవి, ఆయన సతీమణి లక్ష్మీ నివాళి అర్పించారు.