Rajinikanth:‘సంఘి’ అంటే తప్పు మాట కాదు: రజనీకాంత్

కోడంబాక్కం, న్యూస్‌టుడే: ‘సంఘి’ అంటే తప్పుమాట కాదని, తన కుమార్తె కరెక్టుగానే మాట్లాడిందని సూపర్‌స్టార్‌ రజనీకాంత్‌ తెలిపారు. రజనీకాంత్‌ అతిథి పాత్రలో ఆయన కుమార్తె ఐశ్వర్య దర్శకత్వంలో తెరకెక్కిన చిత్రం ‘లాల్‌ సలామ్‌’. లైకా సంస్థ ఈ చిత్రాన్ని నిర్మించింది. ఈ సినిమా ట్రైలర్‌ విడుదల కార్యక్రమం కొన్నిరోజుల క్రితం చెన్నైలో జరిగింది. అందులో భాగంగా రజనీకాంత్‌ కుమార్తె ఐశ్వర్య మాట్లాడుతూ.. ‘మా నాన్న సంఘి కాదు. సంఘి అంటే ఏదో ఒక పార్టీకి, మతానికి మాత్రమే మద్దతుగా వ్యవహరిస్తారనే అర్థం అని తెలిసింది. అలా అయితే మా నాన్న సంఘి కాదు. అలాంటి వ్యక్తిత్వమే అయితే నా ‘లాల్‌ సలామ్‌’లో నటించేవారు కాద’ని చెప్పారు. దీనిపై పలువురు రకరకాలుగా విమర్శలు గుప్పించారు. ఈ నేపథ్యంలో సోమవారం రజనీకాంత్‌ విమానాశ్రయంలో విలేకర్లతో మాట్లాడుతూ.. ‘నా కుమార్తె కరెక్టుగానే మాట్లాడారు. ఆమె అభిప్రాయంలో ఎలాంటి పొరబాటు లేదు. అంతేకాకుండా సంఘి అంటే తప్పుమాట కాద’ని పేర్కొన్నారు.