అన్నాడీఎంకే మాజీ మంత్రి కుమార్తె శివగంగైలో నామినేషన్‌

పార్టీ శ్రేణుల దిగ్భ్రాంతి

స్వతంత్ర అభ్యర్థిగా నామపత్రం అందిస్తున్న ధనలక్ష్మీ

ప్యారిస్‌, న్యూస్‌టుడే: అన్నాడీఎంకే మాజీ మంత్రి కుమార్తె స్వతంత్ర అభ్యర్థిగా శివగంగై నియోజకవర్గం నుంచి పోటీ చేస్తున్నట్లు నామినేషన్‌ దాఖలు చేయడం కలకలం సృష్టించింది. శివగంగైలో డీఎంకే కూటమి నుంచి కాంగ్రెస్‌ తరఫున కార్తి చిదంబరం, అన్నాడీఎంకే నుంచి సేవియర్‌దాస్‌, భాజపా కూటమి తరఫున దేవనాథన్‌ యాదవ్‌, నామ్‌ తమిళర్‌ కట్చి నుంచి ఎళిలరసి బరిలో ఉన్నారు. శివగంగై లోక్‌సభ నియోజకవర్గ పరిధిలో కారైక్కుడి, తిరుప్పత్తూర్‌, శివగంగై, మానామదురై, పుదుక్కోట్టైలోని తిరుమయం, ఆలంగుడి శాసనసభ నియోజకవర్గాలు ఉన్నాయి. ఆలంగుడి స్థానం నుంచి 1984లో అన్నాడీఎంకే తరఫున పోటీచేసి గెలుపొందిన వెంకటాచలం అనంతరం 1996లో స్వతంత్ర అభ్యర్థిగా, ఆ తర్వాత 2001లో మళ్లీ అన్నాడీఎంకే తరఫున బరిలో నిలిచి విజయం సాధించారు. దివంగత మాజీ ముఖ్యమంత్రి జయలలిత మంత్రివర్గంలో మంత్రిగా కూడా విధులు నిర్వహించిన ఆయన 2010లో హత్యకు గురయ్యారు. ఆయన కుటుంబానికి ఆలంగుడి నియోజకవర్గంలో ఇప్పటికీ మంచి పలుకుబడి ఉంది. ఆయన కుమార్తె ధనలక్ష్మీ తమిళ్‌ ముత్తరైయర్‌ వాళ్వురిమై సంఘ వ్యవస్థాపక అధ్యక్షురాలిగా ఉన్నారు. అన్నాడీఎంకే తరఫున సేవియర్‌దాస్‌ అభ్యర్థిగా ప్రకటించి నామినేషన్‌ దాఖలు చేయగా బుధవారం సాయంత్రం స్వతంత్ర అభ్యర్థిగా ధనలక్ష్మీ నామపత్రం అందించడం జిల్లాలోని అన్నాడీఎంకే నేతలను దిగ్భ్రాంతికి గురిచేసింది.

కార్తి చిదంబరంపై అసంతృప్తి..

కార్తి చిదంబరం అభ్యర్థిత్వానికి స్థానిక నాయకుల నుంచి తీవ్ర వ్యతిరేకత రాగా ఆయన తండ్రి, కేంద్ర మాజీ మంత్రి పి.చిదంబరం పలుకుబడితో టికెట్‌ ప్రకటించారు. కార్తి చిదంబరంపై అసంతృప్తితో ఉన్న కాంగ్రెస్‌ నాయకులు మరో పార్టీకి ఓటు వేయడానికి ఇష్టపడితే ధనలక్ష్మీకి ఆ అవకాశం ఉందని శివగంగై నియోజకవర్గ రాజకీయ విశ్లేషకులు చెపుతున్నారు.