ప్రభుత్వం మరిచింది.. పరిశ్రమ పూడ్చింది

మార్టూరు-సెజ్‌ రోడ్డులో గోతులను పూడ్పిస్తున్న టైర్ల కంపెనీ ప్రతినిధులు

అచ్యుతాపురం, న్యూస్‌టుడే: ముఖ్యమంత్రి రాష్ట్రంలో ఏ ప్రాంతంలో అయినా పర్యటిస్తే ఇక్కడ పెండింగ్‌లో ఉన్న పనులను అధికారులు చకచకా పూర్తిచేయడం సాధారణంగా చూస్తూ ఉంటాం. అచ్యుతాపురం సెజ్‌లో ఏటీజీ టైర్ల తయారీ పరిశ్రమ ప్రారంభోత్సవానికి మంగళవారం ముఖ్యమంత్రి జగన్‌ రానున్నారు. ఈ ప్రాంతంలో చాలా గోతులున్నాయి. సీఎం కాన్వాయ్‌ వెళ్లడానికి ఇబ్బందిలేకుండా కంపెనీ వారే గోతులు పూడ్చారు. ప్రమాదకరమైన గోతులతో ఆధ్వానంగా ఉన్న మార్టూరు-సెజ్‌ రోడ్డులో కంపెనీ నిధులతో గోతులను పూడ్చే పనులను రెండు రోజులుగా నిర్వహిస్తున్నారు. కంపెనీని పరిశీలించడానికి వచ్చిన పరిశ్రమల శాఖ మంత్రి అమర్‌నాథ్‌ కాన్వాయ్‌ కొద్దిసేపు ఈ రోడ్డు పనుల వల్ల నిలిచింది. ముఖ్యమంత్రి దిగే హెలిప్యాడ్‌ నిర్మాణ పనులను కంపెనీ ఆవరణలోనే చేపడుతున్నారు.