అనుమానం పెనుభూతమై..

భార్యను కడతేర్చిన భర్త

పూర్ణ (పాత చిత్రం)

బుచ్చెయ్యపేట, న్యూస్‌టుడే: కూలి పనులు చేసుకుంటూ జీవనం సాగించే కుటుంబంలో అనుమానపు బీజం పడింది. కొంతకాలంగా భార్యభర్తల మధ్య గొడవలు మొదలయ్యాయి. అనుమానం పెనుభూతమై భార్యను కడతేర్చాడా భర్త. ఈ హృదయ విదారక ఘటన బుచ్చెయ్యపేట మండలం పొట్టిదొరపాలెంలో గురువారం అర్ధరాత్రి సమయంలో జరిగింది. పోలీసులు, స్థానికులు తెలిపిన వివరాల ప్రకారం.. రామాల సత్తిబాబు, పూర్ణ దంపతులు. వీరికి పదేళ్ల కిందట వివాహమైంది. ఇద్దరు పిల్లలున్నారు. భార్య నడతపై అనుమానం పెంచుకున్న సత్తిబాబు తరచూ ఆమెను వేధిస్తుండేవాడు. పెద్దలు పంచాయితీ చేయడంతో కొద్ది నెలలుగా ఇద్దరూ వేర్వేరుగా ఉంటున్నారు. ఇంటికి సమీపంలోని తోటల్లో గురువారం రాత్రి మరో వ్యక్తితో పూర్ణ ఉండటం చూసిన సత్తిబాబు ఆగ్రహంతో విచక్షణారహితంగా కొట్టడంతో ఆమె అక్కడికక్కడే మరణించింది. అనంతరం అక్కడి నుంచి గ్రామంలోకి వచ్చిన సత్తిబాబు తన భార్యను ఎవరో కొట్టి చంపేస్తున్నారంటూ కేకలు వేస్తూ స్థానికులను నమ్మించే ప్రయత్నం చేశాడు. పోలీసులకు సమాచారం అందడంతో వారు గ్రామానికి చేరుకుని సత్తిబాబును అదుపులోకి తీసుకున్నారు. మృతురాలి అన్నయ్య రమణ ఫిర్యాదు మేరకు కేసు నమోదు చేసి, సత్తిబాబును రిమాండుకు తరలించారు.