సీఎం రమేశ్‌ గెలుపుతో పారిశ్రామిక వృద్ధి

చోడవరం పట్టణం, న్యూస్‌టుడే: అనకాపల్లి ఎంపీగా సీఎం రమేశ్‌ గెలుపుతో పారిశ్రామికంగా జిల్లా అభివృద్ధి చెందుతుందని సినీ నిర్మాత నట్టి కుమార్‌ పేర్కొన్నారు. చోడవరంలో శనివారం విలేకరులతో మాట్లాడుతూ.. ఎన్నికల ప్రచారంలో సీఎం రమేశ్‌కు మద్దతుగా పాల్గొంటున్నానని, కూటమి అభ్యర్థులకు ప్రజాదరణ బాగుందన్నారు. ఎమ్మెల్యేగా పదేళ్లు, ఉప ముఖ్యమంత్రి, పంచాయతీరాజ్‌ శాఖా మంత్రిగా రెండున్నరేళ్లు పనిచేసిన బూడి ముత్యాలనాయుడు అనకాపల్లి జిల్లాకు ఏం చేశారో చెప్పాలని డిమాండు చేశారు. చోడవరం నుంచి అనకాపల్లి వెళ్లే రోడ్డు ఎంత దారుణంగా ఉందో అందరికీ తెలిసిందేనని అన్నారు. ప్రజా సమస్యలపై అసెంబ్లీలో మాట్లాడని ముత్యాలనాయుడు పార్లమెంటుకు వెళ్లి ఏం మాట్లాడతారన్నారు. ఓటమి ఖాయమని తెలిసే కుమారుడు, బావమరిదితో గొడవ పడి దాడులకు దిగారని, తారువ ఆయన జాగీరు కాదని పేర్కొన్నారు. ఎన్నికల కమిషన్‌ వెంటనే స్పందించి ఎంపీ అభ్యర్థిగా ముత్యాలనాయుడును అనర్హుడిగా ప్రకటించాలని కోరారు.