సమాచారం ఇస్తే రూ.లక్ష రివార్డు

సూచనలు చేస్తున్న డీఎంహెచ్‌వో రమణకుమారి

వైద్య విభాగం, న్యూస్‌టుడే: జిల్లాలో ఎక్కడైనా అనధికారికంగా లింగ నిర్ధారణ పరీక్షలు చేస్తున్నట్లు ఆధారాలు అందజేస్తే సంబంధిత వ్యక్తులకు రూ.లక్ష రివార్డు అందజేయనున్నట్లు డీఎంహెచ్‌వో రమణకుమారి ప్రకటించారు. శుక్రవారం ఆమె తన కార్యాలయంలో లింగ నిర్ధారణ చట్టం అమలుతీరుపై సంబంధిత విభాగాల ప్రతినిధులతో సమావేశమయ్యారు. అనుమతులు లేకుండా ఎవరైనా కేంద్రాలు నడిపితే చర్యలు తప్పవని హెచ్చరించారు. ప్రోగ్రామ్‌ అధికారులు, కమిటీ సభ్యులు నెలలో 10 స్కానింగ్‌ కేంద్రాలను తనిఖీ చేసి నివేదికలను సమర్పించాలన్నారు. అదనపు డీఎంహెచ్‌వో రామమోహన్‌, ఇతర అధికారులు పాల్గొన్నారు.