ఆలయ స్థలంలో వెలిసిన జెండాలు

రంగంపేట, న్యూస్‌టుడే: శ్రీభద్రకాళి దేవస్థానం అనుబంధ ఆలయమైన శ్రీ సీతారామచంద్రస్వామి దేవుడి పేరుతో హనుమకొండ పెద్దమ్మగడ్డ శివారులో ఉన్న స్థలంలో రెండు రోజులుగా ఎర్ర జెండాలు, తాత్కాలిక గుడారాలు వెలిశాయి. హనుమకొండ మండలం పెద్దమ్మగడ్డలోని కేఎస్సార్‌ గార్డెన్‌ వెనకాల సర్వే నంబరు 479లో శ్రీ సీతారామచంద్రస్వామి ఆలయం పేరుతో 3 ఎకరాల భూమి ఉంది. రెండు, మూడు రోజులుగా కొందరు ప్రైవేటు వ్యక్తులు జెండాలు పాతారని తెలియడంతో ఆదివారం భద్రకాళి దేవస్థానం కార్యనిర్వహణాధికారిణి శేషుభారతి ఆధ్వర్యంలో ఉద్యోగులు పరిశీలించారు. దేవాలయానికి చెందిన భూమిలో ఎవరైనా ఆక్రమణకు ప్రయత్నిస్తే హిందూ దేవాదాయ ధర్మాదాయ శాఖ చట్టం 30/87 ప్రకారం శిక్షార్హులవుతారని ఈవో ఒక ప్రకటనలో తెలిపారు. పాతిన జెండాలు వెంటనే తొలగించాలని లేకపోతే చట్టపరమైన చర్యలు తీసుకుంటామని హెచ్చరించారు.